2 ຄົນ · ປານກາງ · 5 ນາທີ · ₭ ຖືກ

ມື້ນີ້ທີມງານແຊບ ຊິມາແຊວິທີ ເຮັດ ບັນບົດລ໋ອກ ທີ່ເປັນອາຫານຫວຽດນາມຍອດຮິດ. ເຮັດເອງຢູ່ບ້ານ ສູດງ່າຍໆມັກຫຍັງກະປັບປ່ຽນໄດ້ເດີ.

ວິດິໂອ

ເຄື່ອງປຸງ

ເຄື່ອງເຮັດໄສ້ບັນບົດລ໋ອກ

• ຊີ້ນໝູບົດສົດ 1 ຖ້ວຍນ້ອຍ, ປົນໃສ່ນ້ຳມັນໝູເພື່ອຄວາມຊຸ່ມຊ່ຳ ແລະ ແຊບ
• ເຫັດຫູໜູ (ເຫັດສະໜຸ່ນ) 1 ຖ້ວຍນ້ອຍ, ຊອຍມຸ່ນ
• ຫອມບົ່ວແດງ 3 ຫົວ, ຊອຍມຸ່ນ
• ກະທຽມສົດ 3 ກີບ, ຊອຍມຸ່ນ
• ພິກໄທດຳປົ່ນ 1 ບ່ວງແກງ
• ນ້ຳມັນຫອຍ 1 ບ່ວງແກງ
• ເກືອ ½ ບ່ວງກາເຟ
• ພິກເຜົາ 2 ບ່ວງແກງ, ເອົານ້ຳມັນເຜັດເຜົາ 1 ບ່ວງ ແລະ ເອົາຕ່ອນເຜັດເຜົາ 1 ບ່ວງ
• ນ້ຳມັນພືດ 2 ບ່ວງແກງ, ໃຊ້ໄວ້ຂົ້ວ

ເຄື່ອງປະກອບເຮັດແປ້ງ

• ແປ້ງສິງກະໂປ 1 ຖ້ວຍ
• ນ້ຳຮ້ອນ

ເຄື່ອງເຮັດແຈ່ວ

• ນ້ຳຕານ 2 ບ່ວງແກງ
• ເກືອ ½ ບ່ວງກາເຟ
• ເຜັດດິບ 1 ບ່ວງກາເຟ, ຕຳມຸ່ນ
• ໝາກນາວ 1 ປ່ຽງ, ໃສ່ໜ້ອຍຫລາຍຕາມໃຈ
• ນ້ຳ 2 ບ່ວງແກງ

ເຄື່ອງປະກອບຈຽວຜັກບົ່ວຂຽວ

• ຫອມບົ່ວໃບຊອຍ 3 ບ່ວງແກງ
• ນ້ຳມັນພືດ 1 ຖ້ວຍນ້ອຍ

ວິທີເຮັດ

1.ຄ້າງກະທະໃສ່ນ້ຳມັນ, ຈຽວ ຫອມບົ່ວແດງ ແລະ ກະທຽບສັບ ຈົນຫອມ, ແລ້ວເອົາຊີ້ນໝູລົງຂົ້ວ, ໃສ່ພິກໄທ, ເກືອ, ນ້ຳມັນຫອຍ, ແລະ ເຫັດຫູໜູສັບ.

2. ຂົ້ວເຂົ້າກັນ ຈົນໝູສຸກ ແລ້ວໃສ່ນ້ຳມັນໝາກເຜັດ ແລະ ໜ້າໝາກເຜັດ. ຄົນໃຫ້ເຂົ້າກັນ ແລະ ປົງໄວ້ໃຫ້ເຢັນ

3. ກຽມແປ້ງ: ຖອກແປ້ງສິງກະໂປໃສ່ ຖ້ວຍໃຫຍ່, ເທນ້ຳຮ້ອນລົງໄປເທື່ອລະໜ້ອຍ ຈົນເຫັນວ່າມັນພໍດີແຂ້ນ. ແລ້ວເອົາມືນວດໆແປ້ງຈົນນຽນ. ແລ້ວແບ່ງເປັນກ້ອນ ແລ້ວ ລິ້ງໃຫ້ເປັນແທ່ງຍາວ. ປັ້ນເປັນກ້ອນນ້ອຍ ແລ້ວບີບເປັນແຜ່ນມົນ. ໃສ່ໄສ້ໝູທີ່ຂົ້ວໄວ້ ແລ້ວບີບ ແປ້ງປິດໄສ້ໄວ້. ຫໍ່ໃຫ້ຄົບ.

4. ກຽມຊຶງໜຶ້ງ: ວາງໃບຕອງລົງຊຶງ ແລະ ທານ້ຳມັນໃສ່ຕອງ, ວາງແປ້ງທີ່ຫໍ່ນັ້ນລົງ ລຽງເປັນແຖວ ແລ້ວນຳໄປໜຶ້ງ ປະມານ 20 ນາທີ.

5. ເຮັດແຈ່ວ: ລະລາຍນ້ຳຕານດ້ວຍນ້ຳຮ້ອນ, ໃສ່ເກືອ, ໝາກເຜັດຕຳ, ນ້ຳອຸ່ນ, ໝາກນາວ, ຄົນໃຫ້ເຂົ້າກັນ ແລະ ຊີມລົດຊາດຕາມໃຈ.

6. ເຮັດຈຽວບົ່ວຂຽວ: ຄ້າງໝໍ້ໃສ່ນ້ຳມັນໃຫ້ຮ້ອນໆ ແລ້ວ ຖອກລົງ ຜັກບົ່ວຂຽວຊອຍ.

7. ເອົາບັນບົດລ໋ອກ ເສີບໃສ່ຈານ, ໂຮຍຈຽວບົ່ວຂຽວໃສ່ ແລະ ຫອມບົ່ວຈຽວ. ລາດດ້ວຍນ້ຳແຈ່ວ. ພ້ອມແຊບ!